一般我哋(香港)係話『食咗背脊骨落』，而講『食到背脊骨落』就會係另一種意思。
先由『食咗背脊骨落』嚟講下先，一般係指有人因為一啲原因(可能係請求，亦可能係道歉)，而想請你食個便飯(或接受某啲嘢)，但你係預期得到結果係可能令你成肚火，又或者佢嘅道歉係虛假，噉嘅時候你就可以話【食咗背脊骨落】喇。譬如，有個同事佢想你去幫佢完成某項工序而請你食嘢，仲不繼聲稱壇嘢好簡單，不過其實你已經預見得到呢個任務係一啲都唔好做，食咗佢呢餐飯，你就會做到隻狗噉，噉你就可以講呢句。又譬如，有個同事佢因為某啲事而需要向你道歉，想請你食餐飯，但你預見得到佢嘅道歉係虛假，即可能食完餐飯之後，背後仍然會講你閒話，又或者你唔想接受佢道歉，噉嘅情況你就可以講呢句嘢喇。至於之前講到嘅『食到背脊骨落』係另一種意思，喺香港就係指啲嘢難食。補充一點，雖然一般嚟講都係指人哋請你【食嘢】，但有啲情況亦可以唔係食，譬如……『今日有單嘢益你，收半晝，好數㗎！』，『唉，咪喇，就係因為單嘢太著數，我等等做完實俾人講事講非，簡直食咗都背脊骨落呀……』
